As delegadas da CIG nas tendas de Inditex da provincia da Coruña protestaron na sede da multinacional para reclamar que “cumpra o seu compromiso” e reabra a negociación provincial para abordar as “melloras laborais e sociais que quedaron pendentes”. Fontes de Inditex ratificaron que foron recibidas polo departamento de Recursos Humanos e subliñaron que a CIG xa forma parte da mesa nacional de negociación.

As delegadas da CIG din que queren “facer valer” con esta acción reivindicativa o seu dereito a poder negociar as súas condicións de traballo, do mesmo xeito que fan os compañeiros doutras empresas do grupo. A central sindical ratificou que “foron recibidas” polo persoal de seguridade e por outro departamento da empresa e que agora están “a esperar a ver que solución lles dan” porque insisten en expor a un responsable a súa reclamación dunha negociación provincial específica para A Coruña.

Segundo explicou a Central Sindical nun comunicado, o obxectivo é permanecer nas instalacións ata que a empresa “acceda a negociar” e concrete unha data para “retomar as reunións da mesa”. As delegadas da CIG queren “facer valer” con esta acción reivindicativa o compromiso trasladado por Inditex o pasado mes de decembro e “defender” o seu dereito a poder negociar as súas condicións de traballo, do mesmo xeito que fan os compañeiros doutras empresas do grupo. Neste sentido, criticaron a política de Inditex de “afastar e centralizar” as relacións laborais en Madrid e a insistencia nunha “negociación estatal” na que “non se concede nada” para provincias como a da Coruña.