O ministro para a Transformación Dixital e da Función Pública, José Luís Escrivá, e a alcaldesa da Coruña, Inés Rei, subscribiron este martes o convenio que articula a cesión do edificio A Terraza como sede da Axencia Española de Supervisión da Intelixencia Artificial (Aesia).
O acordo estipula que o Concello se fará cargo das obras necesarias para a adecuación dos espazos ás necesidades da Axencia, que comezarán nas próximas semanas. Pola súa banda, a Aesia encargarase da adaptación dos espazos e das subministracións do inmoble.
No acto de firma tamén estiveron presentes a presidenta da Axencia, Mayte Ledo, secretaria de Estado de Dixitalización e Intelixencia Artificial, e Ignasi Belda, director xeral da Aesia, no que foi o seu primeiro acto público nesta responsabilidade.
Tras a firma, o ministro resaltou o papel que terá esta Axencia, da que dixo que terá un equipo multidisciplinar ao ser necesario tanto enxeñeiros como expertos en asuntos xurídicos, ademais de persoas con coñecemento humanista.
Preguntado polo persoal, sinalou que se irá incorporando de forma progresiva, aínda que fixou o obxectivo de que “antes do verán” estean cubertos xa “algún postos” pero todo iso no marco dun proceso “progresivo”.
Sobre o número de persoas que o integrarán, dixo que é “difícil facer unha previsión”, aínda que apuntou a “uns 80 funcionarios” nunha primeira etapa. “Pero xa se verá”, sinalou nunha comparecencia na que asegurou que a intención é ofrecer tamén a estudantes de universidades a posibilidade de incorporarse con contratos en prácticas.
Pola súa banda, o director da Aesia manifestou que son “moitos os retos que hai que xestionar” e apuntou á intención de pór á cidade “no panorama mundial”, facéndoa “un polo de atracción do talento”.
Mentres, a alcaldesa, Inés Rey, lembrou que A Coruña foi elixida entre as 14 cidades postuladas para ser a sede deste organismo e destacou as potencialidades do edificio da Terraza, na que se acometerán reformas e no que a Aesia desenvolverá a súa acividad de forma progresiva, á vez que se procede ao traslado do persoal da compañía de RTVE.
