A Cidade Vella volve acoller dende este mércores 24 e ata o domingo 28 de xullo a XXVIII edición da Feira das Marabillas. A Asociación Comercial e Empresarial ‘Ciudad Antigua’ da Coruña (ACECA), xunto co Concello, preparan este vento que quere lembrar a Feira Franca do século XVI (así é o nome da feira medieval betanceira que se desenvolveu a semana pasada) e retomouse no 1993 como feira de ambientación medieval.
A inauguración da feira será o vindeiro mércores 24 de xullo ás 12.00 horas na praza de Azcárraga. A partir de aí, un completo programa de ocio, gastronómico e comercial para viaxar no tempo. Actuacións musicais, recreacións históricas e espectáculos teatrais e de acrobacias encherán as prazas e rúas do casco vello herculino, con fermosos recunchos como a Praza das Bárbaras ou As Atochas.
Ata 16 compañías artísticas participarán nesta edición, na que volverá a contarse co Recuncho das Pícaras na praza de María Pita, con atraccións e actividades pensadas para os e as máis pequenas. Entre a extensa programación destaca o encontro de música medieval que se celebrará na igrexa de Santiago o mércores 24 ás 20.30 horas, con entrada libre ata completar capacidade.
O horario de apertura da feira é de 11.00 a 14.00 e de 17.00 a 1.00 horas o mércores, venres e sábado e de 11.00 a 14.00 e de 17.00 a 23.00 horas o domingo.
