O Concello da Coruña regulará as intervencións urbanísticas de rehabilitación de edificios coa aprobación da primeira ordenanza municipal nesta materia. Desde este xoves, día 18, e durante os próximos 15 días, as persoas ou entidades interesadas poderán consultar e facer suxestións respecto diso na web do Consistorio.

Na actualidade, segundo informa o Concello, os sistemas de illamento supoñen unha “mellora importante” da eficiencia enerxética dos edificios, así como “de accesibilidade” para as comunidades de propietarios.

Con esta ordenanza, engade, o Consistorio establecerá “os criterios de intervención nos edificios e os seus acabados, segundo as características das construcións e localización”. Prevé, ademais, “determinar o contido documental” que debe achegarse coa solicitude de licenza ou coa presentación das comunicacións previas das obras e “axilizar a tramitación dos procedementos”.