Membros da Confraría de Pescadores da Coruña mobilizáronse, este mércores ante a Delegación do Goberno, para esixir de novo ao Executivo central e á Xunta “unha saída laboral aos traballadores” que vivían do marisqueo na ría do Burgo unha vez finalizadas as obras de dragado. Ademais, convocaron unha nova reunión “a tres bandas” o vindeiro martes, día 30.

“Evidentemente teñen que facelo, dar unha solución, non deben atrasalo máis se realmente queren que o futuro marisqueiro siga durando anos na ría do Burgo”, recalcou o portavoz do colectivo, Manuel Baldomir, tras apuntar que “dadas as circunstancias” o colectivo vese na “obrigación de abandonar as licenzas”. “É imposible aguantar tanto tempo sen cobrar e tendo que facer fronte aos pagos”, denunciou.

“Estamos á espera de ter unha solución tanto por parte do Goberno do Estado como da Xunta”, insistiu Baldomir, ante unha problemática que afecta a 74 familias. E é que unha vez finalizadas as obras de dragado e acometida a sementeira os mariscadores deben esperar “entre 18 e 24 meses” para poder faenar. Por iso, a Confraría de Pescadores da Coruña convocou unha nova reunión “a tres bandas” (Executivo central, autonómico e o colectivo) o vindeiro martes, día 30. “Esperamos que dunha vez por todas as administracións poidan desencallar esta situación e darnos unha saída laboral aos traballadores”, reclamou.

Doutra banda, explicou que o colectivo “volveu a retomar” o contacto coa eurodeputada do BNG, Ana Miranda, para seguir adiante coa denuncia ante o Parlamento Europeo polo “incumprimento do estudo de impacto ambiental”. O portavoz avanzou tamén un “endurecemento das mobilizacións” con novas protestas os martes e venres na zona da Pasaxe, desde as 14.30 ata as 16.30 horas, e os mércores ante a Delegación do Goberno. “Non nos queda outra alternativa”, apostilou.