A Comisión de Seguimento da emerxencia sanitaria informaba esta mañá da posta en marcha do novo turno de limpeza a consecuencia da ampliación da emerxencia sanitaria a toda a cidade, que entrou en vigor hoxe mesmo. Outros 22 operarios de Valoriza, empresa de emerxencia que reforza a recollida de residuos na cidade, sumáronse este luns aos 32 que xa estaban a traballar previamente. Isto supón, en termos prácticos, un reforzo do 40 % na plantilla de operarios que está a executar a recollida de emerxencia.
Desde este luns “e mentres non se normalice a situación”, apuntou a rexedora, os equipos de Valoriza traballarán en dobre turno en horario diurno, de 7.15 a 15.15 horas, e de 15.15 a 23.15 horas.
Na xornada de onte, que non tivo ningunha incidencia por incendio de colectores (van un total de 159), a empresa de emerxencia que reforza a recollida de residuos na cidade, Valoriza, recolleu un total de 70 toneladas de lixo, sen incidencias.
Paralelamente, a empresa concesionaria Prezero continúa sufrindo a estrana folga indefinida que supostamente non está a secundar ningunha persoa traballadora cando se cumpre o seu 8º día, ao igual que nas anteriores xornadas.
Malia non haber ningún traballador en folga, as porcentaxes de recollida seguen sendo
prácticamente inexistentes nalgunhas zonas da cidade. Nesta noite non se rexistrou recollida de lixo en barrios como Matogrande e Eirís, mentres que no centro a recollida foi masiva.
Así foi, na pasada madrugada, o balance de recollida de lixo por parte da empresa concesionaria do servizo de recollida de lixo, Prezero:
- Monte Alto: 35%
- Cidade Vella: 60%
- Pescaría – Centro: 100%
- Os Rosales – Labañou: 10%
- Estadio: 100%
- Ventorrillo – Agra do Orzán: 20%
- Sagrada Familia: 80%
- A Sardiñeira – Elviña: 30%
- Os Mallos: 35%
- O Castrillón: 30%
- Os Castros: 55%
- Matogrande – Eirís: 0%
- Mesoiro – Feáns – Valaire: 15%
