Centos de traballadoras do comercio de alimentación da Coruña manifestáronse este domingo para reclamar unhas condicións laborais e salariais xustas, nunha mobilización previa ás novas xornadas de folga previstas para os días 10, 11 e 13 de outubro. Segundo a CIG, tras tres meses de reunións, mobilizacións e varias xornadas de folga, non se produciron avances “suficientes” para alcanzar un acordo que mellore as condicións do sector.
A central sindical lamentou que as propostas da patronal, liderada por Gadis e Froiz, non responden, ao seu xuízo, ás principais reivindicacións das traballadoras: a recuperación e mantemento do poder adquisitivo, a redución da xornada anual, a mellora da conciliación e das condicións económicas e sociais do convenio. A CIG cualificou as propostas de “absolutamente insuficientes” e asegurou que a patronal se negou mesmo a asumir un complemento de antigüidade como o recoñecido ás traballadoras de Pontevedra.
Por este motivo, as traballadoras de toda a provincia saíron ás rúas nunha mobilización que, segundo a CIG, busca trasladar unha mensaxe de “unidade, dignidade e forza” fronte ao que considera “inmobilismo” da patronal, ademais de reclamar o desbloqueo da negociación do convenio colectivo.
Pola súa banda, a Asociación de Supermercados da Coruña (ASAC) reiterou a súa “vontade de pechar o convenio” e instou os sindicatos a desbloquear a negociación. A asociación asegurou que as empresas que a integran xa pagan entre un 6% e un 11% máis que a maioría dos seus competidores e que a proposta actual contempla unha suba salarial do 4% en 2026 e do 12,2% acumulado en catro anos, ademais de mecanismos vinculados ao IPC e melloras laborais, sociais e de conciliación. ASAC considera “difícil de entender” que a proposta non se traducise nun acordo e advertiu de que prolongar o conflito “ten consecuencias” para o emprego, os traballadores e o comercio galego.
