Unha muller resultou ferida de carácter leve tras rexistrarse unha explosión no quentador da súa vivenda, situada na rúa do Alcalde Lens, na Coruña. O suceso produciuse sobre as 20.00 horas deste sábado, cando a vítima procedía a acender o aparello. Segundo informou o 112 Galicia, a muller foi atendida no mesmo lugar dos feitos polos efectivos do Servizo de Urxencias Sanitarias de Galicia-061, sen que fose necesario trasladala a un centro sanitario.

A explosión provocou danos na cociña e rompeu os cristais do inmoble, ademais de esnaquizar as xanelas doutras vivendas do edificio que dan aos patios interiores. Tras o estalido, tamén foi retirada unha bombona do interior da vivenda. O 112 Galicia mobilizou de urxencia ao 061, aos Bombeiros da Coruña, á Policía Nacional, á Policía Local, a efectivos de Protección Civil e ao persoal da empresa subministradora do gas para intervir no lugar do incidente.