A Asociación da Prensa da Coruña (APC) convocou a sexta edición do premio xornalístico Cronista Emilio Quesada, cuxo obxectivo é resaltar os valores históricos e actuais da cidade da Coruña, das súas institucións e dos seus habitantes.

O galardón leva este nome debido a que a dotación de 1.000 euros que leva prodúcese debido á doazón de Emilio Quesada Zato, que é o xornalista máis veterano da Asociación da Prensa.

Un dos requisitos para participar é que o autor do traballo ten que ser asociado da APC, con polo menos un ano de antigüidade con respecto á data de publicación da peza presentada.

O prazo final para a entrega de traballos, que se depositarán na sede da APC ou se poderán enviar a través de correo electrónico a info@periodistascoruna.es, será o próximo 31 de outubro.

As pezas, xa sexan de radio, prensa, televisión ou web, teñen que ser publicadas, en galego ou castelán, entre o 1 de decembro de 2023 e o 31 de outubro de 2024.