O Palacio Municipal de María Pita acolleu esta mañá unha reunión de traballo entre representantes do Concello e do Real Club Deportivo para pór en común a folla de ruta a seguir no proxecto de remodelación e ampliación do estadio municipal de Riazor, unha das 11 sedes deportivas aprobadas pola FIFA e a RFEF con vistas ao Mundial 2030.
Na reunión participaron, por parte do Concello, o portavoz do goberno municipal, José Manuel Lage, o concelleiro de Cultura e Turismo, Gonzalo Castro, e o concelleiro de Deportes, Manuel Vázquez. Polo Real Club Deportivo tomaron parte o seu director corporativo, Jan Wappler, o responsable do departamento legal, Santiago Liste, o director de instalacións e seguridade, Iván Sánchez, e o director de comunicación do club branquiazul, Manu Sainz.
O Concello comprometeuse a remitir novamente ao Real Club Deportivo o proxecto da candidatura da Coruña ao Mundial 2030, que inclúe a reforma do estadio de Riazor para cumprir coas esixencias expostas pola FIFA.
Nun comunicado, o goberno local remarca, no entanto, que o Deportivo “coñece o proxecto en toda a súa extensión desde o inicio do proceso, sendo partícipe do mesmo“. No entanto, engade que “ante os cambios producidos no consello de administración da entidade, o Concello volveralles a remitir o proxecto para que o poidan avaliar de novo“. Está previsto que o Concello e o Real Club Deportivo volvan reunirse no mes de setembro.
