Este pasado sábado, coincidindo co primeiro partido da Liga “Hipertensión”, un grupo de activistas das Asembleas Abertas Independentistas (AAI) realizaron unha acción na contorna do estadio de Riazor. Un grupo de persoas, disfrazadas con traxes e máscaras laranxas, amosaban unha pancarta co lema “CRTVG pública e en galego. #DefendeaGalega”.

O grupo repartía uns panfletos nos que explica o sentir da campaña, denunciando que a canle pública galega está sendo manipulada, como o demostran os máis de 300 #VenresNegros nos que os traballadores da CRTVG se visten de negro para denunciar as malas prácticas do poder político para coa liberdade de expresión e liberdade de prensa.

Ademais, piden apoio e solidariedade coas loitas dos traballadores da campaña #DefendeaGalega, e denuncian que a Xunta prepara unha nova lei para Q”converter a TVG nun aparello de propaganda do PP” e permita a entrada do castelán na canle pública.
”Temos que garantir a independencia dos medios públicos”, sinalan as AAI.