Seguen sucedéndose as reaccións trala convocatoria de eleccións xerais realizada por Pedro Sánchez para o vindeiro 29 de novembro. Dende o espectro da esquerda, o Movemento Sumar Galicia–Fronte Ampla (así se chamará a candidatura de esquerdas a nivel estatal, recollendo o legado da histórica coalición de esquerdas uruguaia) chama a unir a esquerda galega “pola vivenda e contra a extrema dereita”.
O seu secretario xeral, Paulo Carlos López, apela a construír unha candidatura ampla que permita “manter e ampliar a representación galega na fronte plurinacional” e impulsar unha nova maioría progresista. “O que está en xogo é se a próxima lexislatura serve para garantir unha vivenda digna, reforzar os servizos públicos e ampliar dereitos, ou para abrirlles a porta aos recortes e á extrema dereita. Nós temos clara a prioridade, e é que a política responda ás necesidades da maioría social” , sinala López.
A organización aprobará este mércores, 7 de outubro, na súa Executiva, o regulamento para a elección das candidaturas. O texto será ratificado o venres, 9 de outubro, pola Coordinadora Nacional Galega. O proceso permitirá anunciar o 19 de outubro as persoas que encabezarán as listas pola Coruña, Lugo, Ourense e Pontevedra.
Neste sentido, Movemento Sumar Galicia–Fronte Ampla fai un chamamento expreso a Esquerda Unida, Verdes-Equo, Podemos Galicia e as candidaturas locais a “unirse á Fronte Ampla”.
A Coruña demostra que a vivenda é a máxima preocupación da sociedade cunha gran mobilización
