Estes días de mareas vivas están deixando ao descuberto os teoricamente rexenerados fondos da ría do Burgo. Despois du investimento de 37,5 millons de euros públicos, para o Concello de Oleiros, os resultados non son os mellores.

“A enorme intervención pública de rexeneración da ría da Pasaxe deixou moitos aspectos sen resolver, que se poñen de manifesto a cada paso”, sinalan dende o Concello, dende onde alertan ademais que “a Dirección Xeral de Costas aínda non respondeu ás demandas do Concello de Oleiros para considerar a obra satisfactoriamente rematada”.

Concello e veciñanza xa protestaron cando Costas daba por concluída a obra sen realizar a conexión peonil entre os distintos treitos do paseo marítimo entra Agramar e O Graxal, que continúa igual, con treitos inaccesibles e zonas nas que non é posible a continuidade peonil.

“Hoxe, en pleno verán, as protagonistas son as lameiras nas que deixaron antigas zonas de baño próximas a Agramar e Beiramar, que lonxe de potenciarse como áreas para o uso acuático, quedaron cheas de obstáculos, pedras e raíces da grandes árbores, cunha sensación total de abandono dunha zona que tradicionalmente recibía o nome de “areal””, lamentan.

Ademais, tamén moitos veciños constataron que algúns dos areais máis produtivos de Santa Cristina foron esquilmados e degradados, pese a que non presentaban un grave problema de contaminación, lembrando que as zonas máis críticas en canto a deterioro situábanse no fondo da ría, onde historicamente íanse depositando os residuos das fábricas de Koipe e Cross.