A coruñesa Bea Lema vén de recibir a nova de que é a gañadora do Premio Nacional do Cómic 2024. O premio, outorgado polo Ministerio de Cultura, está dotado con 30.000 euros.
O xurado destacou a súa obra ‘O corpo de Cristo’ (Astiberri) por “ser unha obra innovadora, formalmente arriscada, con texturas e composicións que transcenden as técnicas máis empregadas sen renunciar ao uso do humor e a mirada poética. A obra ten gran profundidade e sensibilidade para forma de abordar un tema tan complexo como a saúde mental desde a propia experiencia da autora, así como a reivindicación da importancia dos coidados.”
Así mesmo, o xurado indicou que ‘O corpo de Cristo’ de Bea Lema “é unha obra de gran beleza visual e profunda emoción que ofrece unha mirada sorprendente na relación nai e filla, sendo unha auténtica exploración da linguaxe que utiliza recursos estéticos alternativos e mostra un novo camiño de tecer a historia reivindicando a propia memoria migrante”.
Biografía
A ilustradora e autora de banda deseñada Bea Lema naceu na Coruña en 1985. Ten realizado de ilustracións para revistas, carteis ou libros infantís. O seu traballo, xeralmente autobiográfico, trata temas como a loucura, as relacións familia, relixión, trauma e rituais populares.
En 2017 recibiu o XII Premio Castelao de Cómic da Deputación da Coruña por “O Corpo de Cristo, a súa primeira novela gráfica, un proxecto autobiográfico que analiza a enfermidade mental desde a perspectiva dunha nena.
En 2022 recibiu unha bolsa para completar a residencia de novela gráfica na Maison des auteurs de Angoulême (Francia). O libro no que traballou, partindo do primeiro cómic e que foi publicado en Francia pola editorial Sarbacane baixo o título ‘Des maux à dire’ e en España de Astiberri co título ‘El cuerpo de Cristo’, foi galardoado co Premio do Xurado do Festival BD 2023 en Pèrigord, e o Premio do Público do Festival de Angoulême, o Premio Bédélys do Festival de Cómic de Montreal á mellor obra estranxeira e Gran Premio de a heroína Madame Figaro en 2024.
Actualmente traballa na adaptación deste libro a unha curtametraxe de animación.
