O Centro de Inserción Social da Coruña acollía esta mañá a celebración polo Día da Mercé. Un día, sen internos (as persoas en réxime de semiliberdade que transitan na súa condena polo terceiro grao poden volver a casa cada venres), para celebrar a patroa das Insitucións Penitenciarias, que a Secretaría Xeral e o Ministerio aproveita para premiar a funcionarios, e nalgún caso, ás entidades sociais que traballan arredor do CIS.
En presenza da subdelegada do Goberno María Rivas e a presidenta da Fundación Barrié, Pilar Romero Vázquez-Gulías (cómpre lembrar que o CIS leva o nome de Carmela Arias y Díaz de Rábago, primeira presidenta da Fundación), abriu a xornada a directora do Centro, Carla García, que destacou no seu discurso a primeira foto do evento, con 3 mulleres sentadas en postos de responsabilidade. “Se Concepción Arenal levantará a cabeza estaría orgullosa”, sinalou, dando exemplos de como as mulleres segue botando abaixo teitos de cristal (puxo como exemplos a primeira presidenta do Tribunal Supremo, María Isabel Perelló; ou a primeira árbitra da 1ª División, Marta Huerta).
Pero non esqueceu o repunte de casos de violencia machista que sufrimos neses meses, apelando á sororidade entre mulleres e na responsabilidade das administracións para que “o que agora é un fito histórico sexa algo evidente para os nosos fillos e fillas”.
García parabenizou aos premiados na xornada, en boa medida aos funcionarios que reciben a Medalla de Bronce ao Mérito Penitenciario. Pero sobre todo destacou o papel das profesionais Rosaura Romo e Ana Suárez, da Fundación Érguete, “por crer no voso traballo e polo o acompañamento que facedes que fai crecer o proceso de reinserción que ten que fomentar esta institución”.
A Subdelegada do goberno Maria Rivas destacou fixo un repaso lexislativo, deixando claro queda “moito traballo por facer, despois de 45 anos de traballo penitenciario dende a Lei de 1979”. Deu protagonismo ao “persoal de Institucións Penitenciarias”, neste día de recoñecementos internos, pero tamén destacou “o papel fundamental de apoio das empresas da contorna para atopar traballo a internos, que supón moito máis que un salario”.
A Subdelegada tamén puxo en valor, e destacou como exemplo de colaboración entre entidades o papel das técnicas de Érguete, que están detrás de proxectos fundamentais como Épico, ou o Eva, programas estatais que se desenvolven de xeito pioneiro nas prisións coruñesas coa colaboración intrínseca de Érguete.
Rivas non quixo esquecer a labor dos estamentos xudiciais e policiais “como eslabóns fundamentais da cadena de reinserción”, obviando, iso sí, a falta de comunicación interna entre ás tres institucións.
A xornada tamén deixou dúas mencións honoríficas a dous funcionarios Cristina Remeseiro Cao e Jose Enrique Robelo Sande, polos seus 25 anos de traxectoria profesional, ademais de dar un detalle polas xubilacións aos Jose Manuel Fdez Martínez, Jose Miguel Olmos Díaz, Jose Luis García Alonso.
Máis novas
A Fundación Érguete, Agalure, AFACO e a Fundación Mulleres, os premios socias da Deputación
