”Fagamos lenda” reza a campaña de promoción do Basquet Coruña durante este verán pola cidade. E lenda foi o que protagonizaron onte os xogadores do equipo laranxa. Lenda é a que recordarán as 9.300 persoas que ateigaron o Coliseum na histórica estrea do Leyma na ACB, e que dentro de 30 anos lembrarán canto cantamos “Barca, Madrid, xa estamos aquí”, como fixeramos en Riazor a comezos dos 90.

Nin un guionista de netflix imaxinaría un final coma o da primeira vitoria da historia do Leyma na ACB. Unha tripla con tiro libre de Barrueta a 2 segundos do final, e unha boa defensa sobre o eterno Llul, permitiron á cidade gozar dunha vitoria pola mínima (86-85) ante todo un Real Madrid. Todo baixo un ambiente excepcional, inmellorable, que lembra ás mellores ocasións da Copa

Inmellorable estrea do @basquetcoruna no Coliseum!! Que pasada!! pic.twitter.com/TwDbwf54Wl

— Xornal da Coruña (@xornaldacoruna) September 29, 2024

Ao longo do partido o Madrid parecía que se escapaba fácil en varias ocasións, gracias, en parte, aos rebotes ofensivos dos Garuba ou Tavares. Pero o equipo laranxa non deixou de crer en ningún momento, gracias ao impacto positivo de cada xogador que ía entrando. A calidade de Taylor no “driblin”, os rebotes e os alleyoops de Diagne (sen dúbida o xogador máis querido por esta afección que o leva vendo crecer dende que chegou ao país), os pases e roubos de Huskic, as aparicións de Beka, os longos brazos de Figueroa, e as triplas de Jakovics, fundamentais para recuperar distancia cando o RM parecía que se marchaba ao comezo do terceiro cuarto.

Chegaba o treito final, e a bancada comezaba a ruxir en cada ataque. Os xogadores do Madrid fallaban os tiros libres e Jakovis e Taylor, por primeira vez xuntos sobre a pista, mantiñan ao equipo no partido.

E chegaba o telón final, con 3 abaixo na última posesión. Taylor intentaba colarse para sacar o balón fóra para un Barrueta que, apenas 2 minutos fallaba unha trilpa só para case que empatar o partido, pero que nesta ocasión colou unha tripla sobre Musa, forzando a persoal e metendo ao equipo 1 arriba.
Quedaba o ataque rival, e como non, Llul, eterno especialista en convertir remontadas, colleu a pelota pero unha boa defensa coral sacaba o balón case de dentro.

Euforia no Coliseum, que volvía vibrar co Tsunami Laranxa antes da marcha dos xogadores aos vestiarios.

Parece que vén unha temporada moi bonita co equipo coruñés na máxima categoría do baloncesto estatal. A estrea, mellor imposible.

Epi

Fixo un repaso histórico polos 30 anos de historia o adestrador Diego Epifanio que quixo agradecer e felicitar a toda a familia laranxa antes de valorar o partido. Epi non esqueceu á afección e nomeadamente ao Tsunami laranxa!

No deportivo, o emocionado míster, que xa albiscara unha vitoria pola mínima, destacou a fe do equipo ata o final.