A Xunta de Goberno do Concello da Coruña dará luz verde este mércores aos trámites para completar o procedemento necesario para que a Empresa Municipal de Vivenda, Servizos e Actividades (EMVSA) asuma a xestión do parque municipal de vivenda.
Trátase dunha iniciativa impulsada coa finalidade de adaptar o patrimonio residencial do Concello ás necesidades de vivenda social que se detecten na cidade a medio e longo prazo. Así o informou a rexedora, Inés Rey, nunha comparecencia na que precisou que, a día de hoxe, son máis de 400 os inmobles do Concello destinados a arrendamentos sociais. A estes bens patrimoniais hai que sumar 26 locais, 76 prazas de garaxe e 63 trasteiros.
A data de inicio que marca o encargo a EMVSA para xestionar o Banco Municipal de Vivenda será o próximo 26 outubro e terá vixencia, de inicio, entre os anos 2025 e 2026. Por outra banda, a alcaldesa informou que o consistorio investirá 1,5 milones de euros en melloras de dixitalización e mobilidade sustentable. Fíxoo ao informar sobre o novo contrato de mantemento do software de BiciCoruña, servizo municipal que xa pasou o millón de persoas usuarias no que vai de ano.
