De seguro que ducias de familias da Costa da Morte se achegarán este vindeiro 26 de outubro a Santiago de Compostela para unirse á gran mobilización convocada contra os recortes. A Plataforma Galega en defensa do ensino público chama a toda a comunidade educativa a manifestarse despois de comprobar neste convulso mes, o proceso de desmantelamento do ensino público por parte da goberno Xunta do Partido Popular

A Plataforma denuncia “o contraste entre a propaganda da Consellaría e as protestas máis numerosas dos últimos anos protagonizadas polas ANPAs e polos centros educativos ante a falta de profesorado, sobre todo de especialistas para a atención á diversidade nos colexios de infantil e primaria, así como pola desatención absoluta ás demandas de alumnado e profesorado dos centros de secundaria, FP e ensinanzas de réxime especial”.

A trampa do PROA é un dos mellores exemplos, pois a Xunta está intentando cubrir necesidades estruturais dos centros cos parches financiados con fondos europeos e con menos atribucións. Ademais, a pesar do propagandístico PROA, numerosos centros do país (ata 120 segundo a CIG) quedaron auxiliares de Pedagoxía Terapéutica ou Audición e Linguaxe, ademais de quedar tamén sen o reforzo educativo para o que están destinadas as axudas europeas.

Definiron algunhas das eivas que sofren os centros de ensino: “Desdobres non autorizados en aulas que superaban abertamente as ratios máximas, incremento da matrícula nos cursos que xa tiñan entre 20 e 25 estudantes, non computar como dobre ou triple o alumnado con trastorno de conduta, discapacidade ou dependencia, aulas con nenos de distintos niveis ou idades nas que non se cumpren as ratios máximas, falta de profesorado especialista, sobre todo de Pedagoxía Terapéutica, Audición e Linguaxe e orientación, que cada vez máis teñen que compartir varios centros ou se contratan a media xornada, así como falta de persoal coidador”.

Unión fronte a división

As organizacións convocantes coinciden en que “o ensino público galego está a deteriorarse e que é preciso unha reacción conxunta e contundente de toda a comunidade educativa, que non acepta parches nin remendos e na que se unan todas as reivindicacións, de todas as etapas educativas, de todos os colectivos”. “Isto é especialmente importante porque a Consellaría tamén xoga á estratexia de dividir, de que cada centro teña que pelexar pola dotación de máis persoal de forma individual, de que as necesidades nunhas etapas educativas poden ser diferentes ás doutras polo propio perfil do alumnado, pero na marcha do día 26 hai un punto en común: a defensa do ensino público galego, desde os 3 anos ás ensinanzas postobrigatorias, e de aí que fagamos un chamamento a participar a toda a comunidade educativa e tamén a toda a sociedade, porque a educación pública é un tema transversal como o é a sanidade ou os servizos sociais”, sentenciaron indo máis alá: “Ademais as Anpas por primeira vez en moito tempo atopámonos coa censura e ocultación de información, dado que os equipos directivos dicíannos que non nos podían dar datos por orde das inspeccións”.

A manifestación

A convocatoria para todas as comunidades educativas (familias, estudantado e profesorado) está lanzada por Plataforma Galega en Defensa do Ensino Público, CIG-Ensino, ANPAS Galegas, ERGUER, Asociación Socio-Pedagóxica Galega /AS-PG), BNG e Galiza Nova. A manifestación sairá da Alameda ás 12:00h.

Máis novas sobre os recortes

As familias de Oleiros maniféstanse en contra dos recortes no colexios

Denuncian “problemas” cos recortes en 62 centros de ensino da provincia da Coruña