Érica Esmorís (A Coruña) e Rosa Aneiros (Meirás) son as gañadoras do XVIII Premio Raíña Lupa de literatura infantil e xuvenil, que organiza a Deputación da Coruña.

Tal e como sinalan nun comunicado, esta é a primeira edición na que se outorgan os galardóns nas dúas categorías de forma independente.

Esmorís levouse o premio na modalidade infantil pola obra ‘Terás que crela’, mentres que Aneiros fíxoo na xuvenil con ‘Unha historia de amor como outra calquera’.

De ‘Terás que crela’, o xurado destacou “a potencia da voz protagonista, o sentido do humor e a proposta lúdica da historia”. “A mentira é o motor da ficción que enriquece a vida da protagonista e que lle permite valorar o extraordinario da vida cotiá”, apuntaron.

Para o xurado, ‘Unha historia de amor como outra calquera’ é unha novela de “aprendizaxe, con sentido do humor, que establece un contraste interesante entre o mundo cotián da adolescente protagonista e o mundo científico da Antártida”.
“É unha obra áxil, que se le de bo grado, con estrutura circular e que fai un uso da lingua actual e vivo. Incide, ademais, nas relacións interpersoais na familia e na conciencia ecolóxica, e destaca a orixinalidade de presentar o amor máis aló das relacións románticas na adolescencia”

A deputada de Cultura, Natividade González, presidiu o xurado que integraron os vogais Rafael Fernández Lorenzo, Iria Misa, Leticia Barbadillo, Raquel Senra e Carlos Negro.