Do total de mulleres traballadoras residentes en España de entre 16 e 74 anos, 4,5 millóns de mulleres sufriron acoso sexual no traballo nalgún momento da súa vida segundo a primeira Enquisa Europea de Violencia de Xénero realizada en 2022. No últimos cinco anos, o número de vítimas alcanzaría case os 2 millóns, e no último ano da enquisa contabilizáronse 723.958 mil traballadoras acosadas.

Este tipo de violencia contra as mulleres é das máis invisibles, e moitas vítimas non denuncian por medo ás represalias ou a perder o seu emprego.

Ante esta situación o Colexio Profesional de Graduados Sociais de A Coruña e Ourense crea un ciclo formativo para buscar fórmulas para evitar estes problemas

A xornada, en liña, estará impartida por dous especialistas de FREMAP, a enxeñeira técnica industrial experta en PRL María Dolores Rodríguez e o psicólogo especialista en asesoramento e divulgación de riscos psicosociais David Piélago.

Ambos os expertos explicarán esta tarde aos colexiados asistentes á xornada formativa a importancia de crear contornas de traballo seguras, onde predominen o respecto e a comodidade, promovendo a cultura de tolerancia cero diante calquera forma de agresión ou discriminación destacando entre elas a prevención do acoso sexual e por razón de sexo. A sesión será moi práctica, e ambos os relatores brindarán exemplos de condutas intolerables e accións diante das que hai que estar alerta. Revisarán, así mesmo, a documentación que calquera empresa debe dispoñer en materia de prevención de riscos laborais e analizarán os documentos esixibles na lexislación nacional.

Cifras moi graves

As estatísticas visibilizan unha realidade gravísima. “Un de cada cinco acosos sexuais sufridos polas mulleres prodúcense nos centros de traballo e o 98% dos agresores sexuais neste ámbito son homes”. Estímase, ademais, que o 72% das vítimas non chega a informar á empresa.

En canto ao tamaño da empresa, os informes apuntan a que estas situacións son máis difíciles de abordar cando se producen en pemes e micropemes, onde non sempre se aplica a normativa e onde, en moitos casos, non existe representación legal das persoas traballadoras. Os acosos prevalecen máis en contratos precarios (seguramente por razóns socioeconómicas) e en postos de mando (por unha maior consciencia e denuncia).

As accións máis frecuentes das que son obxecto as mulleres traballadoras acosadas son mensaxes non desexadas, correos electrónicos e chamadas non desexadas, espionaxe, agasallos, piropos e comentarios sexuais, humor sexista, xestos ou miradas insinuantes, contacto físico ou peticións e invitacións de natureza sexual.

Para loitar contra esa realidade é esencial que os protocolos de acoso funcionen. Instalar contornas seguras, arbitrar procedementos específicos de prevención e mecanismos para facer posible ás denuncias ou reclamacións é, pois, prioritario.