Máis de 400 nenos, nenas e adolescentes galegos participaron nun acto na Coruña para reivindicar os dereitos da infancia nunha iniciativa promovida pola Plataforma de Organizacións de Infancia de Galicia (POIG), en colaboración coa Xunta.

O obxectivo foi, segundo os promotores, “dar voz á infancia e a adolescencia para que expresen as súas propostas, facendo uso da participación infantil como dereito fundamental”. Para iso, participaron menores de entre oito e 17 anos de distintos colexios galegos. Tamén asistiron representantes de entidades sociais.

Coa lema ‘Isto vai de dereitos’, os participantes agruparon as súas propostas en cinco ámbitos de actuación: dereito a ser escoitado e a participación infantil, á non discriminación, ao xogo e tempo libre, á protección fronte á violencia e á saúde e bens de primeira necesidade.

INICIATIVAS CONTRA A VIOLENCIA DE XÉNERO

Nesta xornada, a conselleira de Política Social tamén acompañou a 45 nenas e nenos de terceiro de Primaria do CPI do Camiño Inglés durante o visionado da curtametraxe de animación ‘Eu vou comigo’, dirixida por Chelo Loureiro, que ten como obxectivo sensibilizar sobre a igualdade de xénero.

Antes da proxección, a conselleira explicou que o obxectivo da Xunta é levar este recurso educativo a todos os centros de Infantil e Primaria e reforzar a concienciación nesta materia. Ademais, o director xeral de Loita contra a Violencia de Xénero, Roberto Barba, asistiu este martes a unha reunión do grupo ‘As mosqueteiras’, conformado por doce mulleres con parálise cerebral. Todas elas son usuarias de Aspace e queren dar visibilidade ás mulleres con discapacidade na prevención e loita contra a violencia de xénero.