A Coruña convértese de novo na cidade escollida pola fundación Marta Ortega Pérez (MOP) para acoller unha retrospectiva dun fotógrafo de moda, nesta ocasión, de Irving Penn. Unha mostra con máis de 175 “obxectos únicos e expléndidos” que se pode ver no Centro MOP do Peirao de Batería ata o próximo 1 de maio de 2025.
Así o explicou o comisario da mesma, Jeff L. Rosenheim, durante unha visita guiada para a prensa. “O tacto é unha idea presente en todas as fotos”, sinalou respecto da obra deste artista estadounidense quen consideraba, recalcou, que “as fotografías deben ser obxectos que van á parede, que se toquen”.
‘Irving Penn: Centennial’ é unha exposición organizada por ‘The Metropolitan Museum of Art’ de Nova York en colaboración coa Fundación Irving Penn, que se abrirá ao público na cidade herculina este sábado, día 23, e é a máis completa deste mestre da fotografía exposta en España.
Trátase, segundo indicou Rosenheim, dun percorrido pola obra de Penn ao longo das súas máis de 70 anos, desde os seus comezos a finais da década de 1930 ata os primeiros anos do século XXI.
RETRATOS
A mostra está composta por retratos de personalidades como Salvador Dalí, Truman Capote, Alfred Hitchcock ou Audrey Hepburn, de diferentes portadas da revista Vogue, así como de imaxes de cidadáns anónimos. Abarca, ademais, composicións florais, os bodegóns “polos que sentiu predilección” e o pano de fondo que utilizaba no seu estudo.
É a cuarta mostra impulsada por Marta Ortega na Coruña, tras Peter Lindbergh en 2021, Steven Meissel en 2022 e Helmut Newton en 2023, e do mesmo xeito que as anteriores, rodeouse de numerosas celebrities do mundo da moda e a cultura para a súa preinauguración privada celebrada este mércores.
Con motivo da chegada de ‘Irving Penn: Centennial’ á Coruña, a Fundación MOP edita, ademais, en exclusiva o catálogo en español da exposición, con case 300 instantáneas, incluíndo imaxes icónicas, obras inéditas e ensaios.
