A alcaldesa da Coruña, Inés Rey, presidiu este venres, no Palacio Municipal de María Pita, a sesión constitutiva da Mesa Sectorial de Vivenda co obxectivo de avanzar na declaración da cidade como zona de mercado residencial tensionado. A rexedora destacou que o acceso á vivenda é “un dos principais retos da cidade”, cunha demanda crecente reflectida nas 3.367 persoas inscritas no Rexistro de Demandantes de Vivenda de Galicia.

Nese sentido, puxo en valor as medidas postas en marcha polo seu goberno no marco do Plan Municipal de Vivenda 2024-2030, a través do que se crearán 4.000 novas vivendas na cidade, 1.100 de protección oficial. Tamén aludiu a avances no plan como a xestión de chan en Visma, a finalización de urbanizacións con chan de VPO e VPP en Xuxán e Someso, a aceleración de licenzas para vivenda pública e protexida ou o impulso de vivenda pública municipal en Pontejos e Xuxán.

Rey tamén subliñou o diálogo co Ministerio de Vivenda para desenvolver chans de titularidade estatal e captar axudas, incluíndo fondos europeos para proxectos estratéxicos como Xuxán. Ademais, sostivo que a colaboración coa Xunta de Galicia “é máxima” e puxo de exemplo o cambio no Plan Xeral de Ordenación Municipal (PXOM) solicitado polo Instituto Galego da Vivenda e Solo (IGVS), incrementando o número de vivendas de protección oficial.