O Concello da Coruña abrirá as portas do belén municipal, na sala de exposicións do Palacio de María Pita, o vindeiro venres, día 13, e incluirá unha nova figura dedicada a Sito Sedes, cantante residente na cidade herculina que faleceu o pasado mes de xullo.
Así o anunciou a alcaldesa, Inés Rey, para quen este artista foi “unha figura clave da música coruñesa e galega, levando a música de orquestras a un status superior, e merece ter este recoñecemento da súa cidade”.
A súa figura atópase en proceso de elaboración polo responsable artístico do belén, Luís Cousillas, e será presentada no acto de apertura o nacemento o día 13. O mesmo conta con “numerosas figuras de coruñeses e coruñesas ilustres” como Luísa Villalta, Isabel Zendal, Ramón Pérez Costais, Pablo Picasso, Mauro Silva, Arsenio Iglesias ou Concepción Arenal.
Sedes, nacido en Narón en 1946, foi veciño da Coruña a maior parte da súa vida e nela desenvolveu a súa traxectoria profesional como cantante. “É considerado un dos máximos expoñentes da canción de orquestra, sendo protagonista do período dourado das devanditas formacións, no que Os Satélites foi unha das máis destacadas”, lembra o Concello.
