Este venres, despois de varios meses de comparecencias na Comisión da Fachada Marítima de diferentes entidades sociais e económicas da comarca, vai haber unha importante reunión para avaliar un estudo final, que podería ser levado á licitación se sae aprobado pola Comisión Coruña Marítima.
Un documento que non garante a titularidade pública dos peiraos de San Diego e Batería, e que contema a construción de edificios de vivendas nos mesmos para “garantir a viabilidade económica do proxecto”. Unha medida controvertida, xa criticada dende a sociedade civil, como Defensa do Común.
O documento recolle tamén un “equipamento cultural icónico” e un enlace de tren de cercanías, entre outras propostas.
O PP xa se ten posicionado a favor, sinalando que as “liñas principais do estudo son bos vimbios para comezar a deseñar o desenvolvemento destes terreos”.
Dende a sociedade civil, compartimos as estimacións de Defensa do Común respecto ao concurso de ideas para o futuro deseño portuario. A plataforma cidadá, co aval que lle proporciona a súa traxectoria na defensa dos espazos públicos portuarios dende as vertentes institucional e social, esíxirá a súa participación real para a defensa dos usos e dominios públicos e para amosar a súa oposición firme á obtención de plusvalías especulativas.
Decálogo de Defensa do Común para a Comisión Especial Fachada Marítima
- 1.- Instar ao Goberno municipal a que elabore no prazo de seis meses as bases dunha proposta de ordenación (de usos e urbanística) e de xestión para o porto interior (peiraos de Bateria/Calvo Sotelo e San Diego), aos efectos do seu traslado e negociación coas restantes administracións competentes e co obxectivo de conveniar, deixando sen efecto os Convenios de 2004, os seguintes apartados :
– a) Modificación dos instrumentos de ordenación de usos (Documento de utilización dos espazos portuarios) e urbanísticos (Plan especial de ordenación da zona de servizo do porto e PXOM).
– b) Modelo de gobernanza (ente público de xestión). - 2.- Apoio e potenciación da continuidade da actividade portuaria no porto interior, en especial no referido ás actividades pesqueiras e de transformación, de economía azul e de actividades comerciais portuarias. Nos terreos funcionalmente ou tecnicamente non necesarios para a actividade portuaria, integración do uso de interacción porto-cidade, con destino a usos dotacionais públicos (equipamentos, espazos libres e zonas verdes) dentro do obxectivo dun gran parque urbano.
- 3.- Mantemento da natureza demanial dos terreos, evitando a desafectación e correlativa mutación a patrimoniais dos mesmos. En consecuencia, exclusión do uso residencial.
- 4.- Coherencia e axuste da futura ordenación do porto interior dentro do ámbito do conxunto do bordo litoral e da súa continuidade polas Xubias ata A Pasaxe, en especial no relativo aos sistemas xerais e ás normas de aplicación directa de preservación dos valores ambientais, naturais e paisaxísticos.
- 5.- Caracterización da natureza e réxime xurídico da entidade pública de xestión dos terreos de interacción porto-cidade, así como das súas fontes de financiamento.
- 6.- Esixencia ao Goberno do Estado da condonación do préstamo de Portos do Estado coa Autoridade Portuaria, así como a dotación plurianual significativa de financiamento ás actuacións urbanizadoras de interacción porto-cidade no porto interior, debendo en ambos casos ser incluidas na programación plurianual dos Orzamentos xerais do Estado para o 2025. Todo ilo sen prexuizo da procedencia de renegociación das condicións (amortización e intereses) de dito préstamo.
- 7.- Previsión dentro do novo Plan estratéxico e Plan de empresa da suficiencia de recursos ordinarios derivados da actividade portuaria (taxas de ocupación e de actividade) cos que asegurar tanto a cobertura do financiamento de investimentos operativos como do pago do servizo da débeda.
- 8.- Dentro do obxectivo do marco de referencia supra-municipal da futura ordenación do porto interior, integrar a mobilidade metropolitana (viaria e ferroviaria) como eixo fundamental na ordenación, coa previsión de integración da estación de San Cristobal nunha futura rede de cercanías.
- 9.- Asegurar a imprescindible participación pública e cidadá en todas as fases definidoras do novo escenario do porto interior. Creación dunha plataforma ou foro de participación estable sobre o litoral, aberto a entidades representativas, aos efectos de colaboración participada na elaboración de propostas, en especial as relativas aos apartados 1 e 5 antes sinalados.
- 10.- Someter a consulta popular (art. 71 Lei 7/1985) a proposta definitiva sobre a ordenación e xestión do ámbito.
Máis novas da Fachada Marítima
Garante o protocolo da Fachada Marítima a titularidade pública do terreos portuarios de San Diego?
Entidades da Coruña reclaman que a fachada marítima aposte por un porto ligado á economía do mar
Análise: Que foi do interese xeral na reordenación urbanística da fachada litoral nas Xubias?
As 10 promocións urbanísticas formuladas na Coruña prevén a construción de 18.000 novas vivendas
