Este xoves 30 de xaneiro ás 20 horas, o local do Sporting Club Casino da Coruña (Rúa Real, 83) acolle a presentación do número XXII da súa revista Nalgures, editada pola Asociación Cultural de Estudos Históricos de Galicia.
Tal como lembra Pedro López Gómez na introdución desta entrega da cabeceira, a asociación ten entre os seus obxectivos o establecemento de vínculos e a colaboración na investigación, así como a publicación de traballos históricos, dos que xa se superaron os 200 de artigos divulgados.
Este Nalgures que se distribúe neste semestre en 2025 corresponde a traballos rematados no ano precedente, daí que indique 2024 na súa portada, e permite descubrir episodios e protagonistas da historia de Camariñas, Cambre, Ferrol, Malpica, Muxía, Ribadeo, San Munio de Veiga (Ourense), Sobrado dos Monxes, Tui, …
Entre as múltiples materias abordadas cóntanse a arte relixiosa e os mosteiros, o comercio, a historia das mulleres, a historia local, as infraestruturas militares, as biografías de diversas figuras do mundo da política, da nobreza, da agricultura ou da filantropía, así como o estudo de conflitos bélicos antigos e recentes, en clave económica ou de nomes propios.
Este número leva como habitualmente contido gráfico a cor, unha ampla aportación visual que inclúe gravados, fotografías, planos, gráficos cuantitativos e outros tipos de valiosas ilustracións das investigacións incorporadas.
Participan autores como Arturo Abad Pardo analizando a “Guerra de Sucesión en Galicia (1700-1714)”; Xurxo Alfeirán falando sobre o filántropo malpicán Anselmo Villar Amigo; Cristina Barreiro Abuín sobre Sobrado dos Monxes; José Enrique Benlloch Castiñeira sobre a presenza galega na resistencia francesa; José Enrique Benlloch del Río e José Enrique Benlloch Castiñeira afondando sobre o comercio marítimo en Muxía e Camariñas; Alfonso Daniel Fernández Pousada repasando a biografía de Solla de Godoy; Javier García Gómez sobre o Mosteiro de Pravio (Cambre); José Manuel López Hermida e Alberto Paraje Méndez sobre as defensas de Ribadeo; José María López-Dafonte Sanjuán sobre o socialista Francisco Fernández García; Carlos Pereira Martínez sobre o espiritismo en Ferrol do século XIX; Gabriel Plata Parga sobre Gabriel Plata Astray, propulsor del cultivo de la alfalfa en Galicia; Ana Romero Masiá sobre as as espontaneadas de Malpica de Bergantiños na primeira metade do sécul XIX; e Ramón Yzquierdo Perrín sobre a Cruz parroquial de san Munio de Veiga, en Ourense.
Conferencia
Co gallo da presentación do Nalgures XXII, Carlos Pereira impartirá a conferencia «O espiritismo na cidade de Ferrol no século XIX: o centro La Reencarnación».
