A situación do mercado de aluguer na cidade da Coruña segue a ser crítica pola alza incontenible de prezos en case todos os barrios. Cando xa 3 de 4 pisos ofertados son de uso turístico, o Concello vén de anunciar os avances da nova ordenanza reguladora das vivendas de uso turístico (VUT).
A rexedora e o concelleiro de Urbanismo, Rehabilitación e Vivenda explicaron que levarán a proposta saída da Mesa sectorial aberta o pasado mes de novembro á vindeira Xunta de Goberno e que pasará polo pleno o vindeiro mes de febreiro.
Recoñeceron que “a proliferación das VUT está a ter un impacto directo no mercado inmobiliario e, moi en especial, no alugueiro de vivendas”, “tanto por reducir a bolsa de inmobles dispoñibles na cidade como polo incremento dos prezos, que é evidente”.
Requisitos da ordenanza
Entre as principais conclusións da nova normativa, sinalaron que menos da metade cumprirían o contido da mesma das algo máis de 3.300 que se calcula hai.
Recoñeceron que os servizos municipais verificaron que hai vivendas que estaban a ofrecer usos de VUT sen contar coa habilitación administrativa pertinente. Pero explicaron que darán un prazo de tres meses desde a entrada en vigor da ordenanza para que as persoas titulares de inmobles VUT poñan en orde ou obteñan a súa habilitación administrativa
Entre os requisitos aprobados na ordenanza é que “as VUT non poderán estar situadas nunha planta inmediata superior a unha vivenda”.
“Si se permitirá o seu emprazamento en plantas primeiras ou baixas, atendendo, iso si, ás especificidades do Plan xeral en ámbitos como o PEPRI, e tamén se permitirá implantar as VUT en edificios destinados a este tipo de usos en exclusiva”, concretou Francisco Díaz Gallego
Distritos saturados
O texto da nova ordenanza tamén estipula as pautas para declarar unha zona saturada de VUT, o que permitirá impedir a implantación de novas VUT en distritos afectados pola súa excesiva proliferación. Por exemplo, distritos censuais da cidade nos que o número de VUT sexa superior a 0,5 por cada 100 habitantes.
Nova vivenda
A alcaldesa puxo como argumento que “estamos a facilitar a construción de vivenda e de novos polígonos, a avanzar na rehabilitación de vivendas, mais coido que todas e todos somos conscientes de que tamén debemos regular as VUT”.
As 10 promocións urbanísticas formuladas na Coruña prevén a construción de 18.000 novas vivendas
Máis novas
3 de cada 4 vivendas que se ofertan na Coruña xa son de uso turístico
#Ninmedionormal, a campaña de @o.novo.normal.coruna pola Emerxencia Inmobiliaria
