A sección primeira da Audiencia Provincial da Coruña celebrará o luns, día 10, un xuízo por lesións, detención ilegal e roubo con violencia polo que están acusadas cinco persoas, segundo informa o Tribunal Superior de Xustiza de Galicia (TSXG). No seu escrito de cualificación fiscal, sostén que sobre as 23.00 horas do 10 de xuño de 2020, nas inmediacións do parking do centro cívico da Sardiñeira, na Coruña, “nunha actuación conxunta por unha débeda económica agrediron a un home, ao que lle propinaron puñadas” chegando unha das acusadas “a golpealo cunha tubaxe de cobre ou obxecto semellante”.

“Instantes despois introducírono en contra da súa vontade nun vehículo e levárono a un descampado” na Zapateira “onde tras golpealo de novo, dixéronlle que se espise e descalzara e deixárono alí abandonado, levándose con eles a roupa e o calzado, ademais do seu teléfono móbil”. Os obxectos subtraídos foron valorados en 170 euros. Polos delitos que lles imputa, coa agravante de abuso de superioridade e o de reincindencia nalgún dos acusados, o Ministerio Público pide penas que suman seis anos e nove meses de prisión.