Representantes de CIG-Saúde pediron á Fiscalía provincial da Coruña que se abra unha investigación ante o que consideran “falta de medidas preventivas” para garantir a seguridade e a integridade dos traballadores tras a agresión o pasado 3 de febreiro a un enfermeiro e un vixiante de seguridade no Hospital Universitario da Coruña por parte dun paciente.
Fixérono a través dun escrito e por se os feitos puidesen ser constitutivos de infracción penal, segundo expuxo o secretario de Saúde Laboral de CIG na Coruña, Ernesto López, quen sinalou que a iniciativa responde a un acordo na asemblea de traballadores.
O dirixente sindical demandou, ademais, á Consellería de Sanidade que se actúe con medidas de prevención e non cando pase unha incidencia.
“Nós non queremos que sucedan delitos, queremos que a xente vaia a traballar e que non pasen estas cousas”, asegurou en alusión á reunión mantida polo conselleiro de Sanidade, Antonio Gómez Caamaño, co fiscal superior de Galicia, Fernando Suanzes, e con críticas, ademais, á xestión do departamento autonómico.
“A xerencia — do Chuac– ten que coidar da súa xente”, expuxo tamén ao considerar que debe garantir a súa seguridade e ao non descartar que poida haber por parte desta algún tipo de infracción penal por “omisión”.
“Non hai nin protocolos actualizados, nin transmisión nin coordinación”, sentenciou para incidir en que Fiscalía debe valorar unha posible “querela” contra o xerente da área sanitaria da Coruña, Luís Verde.
