A Dirección Territorial na Coruña da Consellería de Medio Ambiente e Cambio Climático notificou ao Concello herculino o inicio dun procedemento sancionador pola comisión dunha infracción administrativa grave en relación á non implantación, informa, do quinto colector. Así o trasladaron fontes da Consellería de Medio Ambiente e Cambio Climático que apuntaron á comisión dunha infracción en relación á Lei de Residuos e Solos Contaminados para unha economía circular.

“Tendo en conta a eventual apreciación das agravantes de intencionalidade, ao tratarse dunha entidade local plenamente coñecedora da normativa aplicable en materia de recollida separada de residuos, así como a continuidade da conduta infractora, establécese unha multa de 100.000 euros”. Faino, precisa, polo “incumprimento na recollida efectiva das fraccións de metais e plásticos” que, engade, “persiste” desde a entrada en vigor da Lei Estatal de Residuos, o 10 de abril de 2022. En concreto, pola “non implantación dun sistema de reciclaxe separada para envases lixeiros e a elevada densidade de poboación”. A sanción establécese de maneira provisional “e sen prexuízo do que resulte da instrución do procedemento”.