A Sala do Civil e Penal do TSXG confirmou a condena de dous anos e medio de cárcere imposta pola sección primeira da Audiencia Provincial da Coruña a un home por cometer un delito de roubo con forza nas cousas, agravado pola circunstancia de multirreincidencia, nun establecemento hostaleiro, do que se levou 800 euros e unha botella de whisky.

Os maxistrados rexeitaron o recurso de apelación presentado pola defensa do acusado, pois consideran suficiente a proba practicada. Así, destacan que se atoparon catro marcas dactilares parciais pertencentes ao procesado no marco da xanela que se forzou para acceder ao local, que estaba pechado no momento dos feitos. A sentenza é recorrible ante o Tribunal Supremo.