A sección terceira da Sala do Contencioso-administrativo do Tribunal Superior de Xustiza de Galicia (TSXG) declarou nula a partida orzamentaria do Concello da Coruña de 2024 destinada á subvención de transporte colectivo urbano de viaxeiros por incorrer en “insuficiencia manifesta” para cubrir os gastos necesarios para os que estaba prevista.
Desta forma, condenou ao concello a incrementar esa partida “na cantidade necesaria para cubrir o gasto que xere a concesión, procurando a súa suficiencia”. O tribunal instou á administración local a realizar “os cálculos oportunos, debidamente dimensionados, de acordo co sucedido en períodos anteriores, a fin de evitar os resultados que se puideron observar para este e outros orzamentos da mesma corporación nos últimos anos”.
Os maxistrados, por tanto, acolleron o recurso interposto pola Compañía de Tranvías, concesionaria do servizo, contra acórdoo de 28 de decembro de 2023 de aprobación do orzamento para o exercicio 2024, en concreto, no referente á partida destinada a cubrir a diferenza entre a tarifa común de transporte colectivo urbano (1,30 euros) e a bonificada, segundo o perfil do usuario do bonobús, a cal ascendía a 7,9 millóns.
“A conclusión que se alcanza coa simple lectura da documental é que ao Concello non lle resultaba allea a insuficiencia da partida orzamentaria discutida para cubrir os gastos que serían necesarios na data en que se aprobou o orzamento para 2024”, explica o TSXG, á vez que destaca que “si dispuña de datos suficientes para elaborar un orzamento axustado ao verdadeiro volume previsible dese gasto”.
FACTURAS
Por outra banda, a Sala sinala que, en decembro de 2023, “quedaban pendentes de pago máis de 9 millóns de euros por facturas emitidas pola empresa para o exercicio 2023 e, a pesar diso, e de que se produciu tamén unha insuficiencia de crédito para exercicios anteriores, o concello decidiu orzar para esa partida a cantidade de 7,9 millóns de euros para cumprir as súas obrigacións coa Compañía de Tranvías durante o ano 2024”.
En definitiva, o TSXG subliña que “se demostrou a insuficiencia manifesta, da que tiña constancia a administración municipal a data de aprobación do orzamento para 2024, que prevé o art. 170.2.c) da Lei Reguladora das Facendas Locais como causa de anulación da partida afecta o orzamento de que se trate”.
A facturación da empresa en 2023, segundo consta no fallo, ascendeu a 19 millóns, dos que 15,3 corresponderon ao Concello da Coruña.
A concesionaria solicitaba na súa demanda que o TSXG ordenase á administración incrementar o orzamento de 2024 polo menos ata 15,3 millóns, pero a Sala decidiu que sexa a propia Corporación local a que, en execución de sentenza, realice unha nova previsión con base nos fundamentos que xustifican o fallo. A resolución non é firme pois cabe recurso de casación ante o Tribunal Supremo.
A veciñanza pide rescatar a liña de bus 10 para o barrio da Sagrada Familia
