O pleno deste xoves 13 de marzo vai ter, ademais dos Orzamentos, aprobados trala cuestión de confianza, un protagonista ambiental. O Concello da Coruña anunciaba o pasado luns que, despois de 5 anos co contrato prorrogado, que no segundo semestre do ano vai realizar a licitación da planta de Nostián. Unha prórroga forzosa que ademais leva caducada dende comezos de ano, e que provoca unha situación de emerxencia para os traballadores, que sofren a falta de investimentos e a devaluación dos seus soldos.
No eido mediombiental, é unha verdadeira mágoa que neste procedemento non estea participando a Plataforma Nostián con Futuro, pois despois de moitos meses de participacións en xuntanzas co Concello, anunciaba hai un ano que deixaba de participar pola “falta de transparencia” do Concello.
A Plataforma nacera coa polémica polo quinto contedor, (que aínda segue moi viva coas ameazas de multa da Consellería) e tiña como un dos alicerces á ADEGA, pero despois da rotura das xuntanzas coa Concelleria de Medio Ambiente, dirixida entón por Noemí Díaz, “foi perdendo forza, como lle pasa a moitos colectivos baseados no esforzo social”, recoñece Alexandre García Regueira, Coordinador de ADEGA na Coruña.
Alexandre recoñe que a nova da licitacion é positiva, pero lembra que ”levan anunciando que o plego vai saír dende hai máis dun ano. Porque xa en outubro de 2023, xa se falaba de que se ía a licitar, e o certo é que agora está fallido a prórroga do contrato”. De feito, en ADEGA, “non nos cremos nada porque van moitas promesas baleiras alá”.
García Regueira lamenta ademais a “cantidade de desinformación que hai sobre a mesa”, o que unida á falta de transparencia e de información fan que a entidade non queira opinar sobre a “condonación da débeda” ou “acordo extraxudicial” coa empresa actual, algo que si critica con moita forza o PP.
Con todo, o coordinador lembra que “o proxecto da planta de Nostián é un proxecto importante para toda o país, porque é diferente ao modelo SOGAMA, que se basea na incineración”. Pero avisa que “hai intereses económicos detrás da planta que opacan o importantes, que é dar un servizo que recupere e recile moitos materiais”.
Lembra que “Sempre pendulou sobre Nostián a sombra da incineración”, e cren que sería “un erro tremendo, porque desvirtuaría o sentido planta, e ademais podería provocar un problema de saúde na Coruña”. Esperan pois que o proceso se centre en que “a planta sexa eficaz, e que sexa un exemplo para toda Galicia, o lei motiv da súa creación tralo incidente de Bens, como modelo de xestión ecolóxico”.
Máis novas
O Concello da Coruña licitará a xestión da planta de Nostián no segundo semestre do ano
