Falouse a semana pasada no Circo de Artesáns dos dereitos das mulleres migrantes (ou máis ben da falta de). Pois o vindeiro martes 8 de abril de 2025, ás 18.00 horas, a sede de Amnistía Internacional da Coruña, acolle unha nova xornada semellante.
O Centro Venezolano de Formación e Investigación Laboral en Galicia (CEFILVEGA), que inicia o seu ciclo de actividades públicas en 2025, e faino co debate “Abrindo o camiño aos dereitos laborais das persoas migrantes”.
Esta actividade contará co apoio de organizacións sociais que atenden aos emigrantes, especialmente aos de Venezuela. Entre eles, destacan pola súa traxectoria a Federación Venezolana en Galicia (FEVEGA), a ONG Ecos Do Sur, a Fundación Ecca Social, a Hermandad Venezolana en Galicia (HEVEGA), así como activistas de organizacións obreiras.
Esperanza Hermida, presidenta de CEFILVEGA, informa que o debate pretende ser “un espazo de libre intercambio de experiencias sobre a integración sociolaboral da diáspora venezolana” e anuncia que, neste contexto de compromiso, “CEFILVEGA presentará o seu primeiro Informe sobre a situación laboral das mulleres migrantes venezolanas en Galicia”.
Este estudo busca avaliar a importancia económica e social da migración venezolana e o seu papel en Galicia. Así mesmo, informa sobre as súas condicións de traballo e formula recomendacións dirixidas a concienciar nos niveis de toma de decisións.
Dado que o número de prazas para participar na actividade é limitado, CEFILVEGA solicita que os interesados se inscriban no correo electrónico cefilvega@gmail.com, indicando no asunto “conversa”. Ao remate do acto presentarase un resumo infográfico do informe.
