A oitava edición do festival de música contemporánea RESIS celebrarase do 25 de abril ao 31 de maio na Coruña e homenaxeará aos compositores Wolgang Rihm e Helmut Lachenmann. Segundo se informou na súa presentación, no Concello da Coruña, contará coa presenza de artistas internacionais e agrupacións como Quatuor Diotima, Arxis Ensemble, Quartet Gerhard, Evo Ensemble, Orquestra e Coro da Sinfónica de Galicia, Real Filharmonía de Galicia ou a Banda Municipal.
Participarán tamén, engade, directores como Armando Merino, Fabián Panisello, Jordi Francés, Daniel Huertas ou Javier Fajardo; solistas como Viriginia Guidi, Florian Hoelscher, Florentin Ginot ou o creador de metasistemas Rubén Panete. Para o concelleiro de Cultura e Turismo, Gonzalo Castro, a programación desta edición do certame “traspasa as fronteiras da cidade e mostra o poder cultural coruñés en Santiago, Madrid ou Roma”. En concreto, o RESIS dará comezo co concerto de Arxis Ensemble xunto ao Coro da Orquestra Sinfónica de Galicia, o venres 25 de abril no Teatro Rosalía de Castro.
