A alcaldesa da Coruña, Inés Rey, reivindicou aos mozos como xeración do cambio no congreso ‘O Que De verdade Importa’, promovido pola fundación do mesmo nome e tamén a de María José Jove.

“Non sodes a xeración perdida, nin a xeración de cristal, ao contrario, sodes a xeración do cambio e encontros como este demostran que hai talento, compromiso e ganas de transformar o mundo”, sinalou ante os asistentes.

Nesta edición, ‘O Que de verdade Importa’ reúne na Coruña a tres testemuñas de superación: Eva Moral, deportista paralímpica; Fabiola Martínez, presidenta da Fundación Kike Osborne, e o hostaleiro Nino Redruello.

Na súa intervención, Rey destacou que “o cambio non comeza nas institucións, nin nos gobernos, nin nos discursos senón en como decidimos actuar cada día e na forma en que escollemos mirar ao outro”.

Nese sentido, reiterou o compromiso do municipio coa mocidade: “A Coruña é unha cidade que cre en vós, que escoita, que acompaña e que quere que cada un de vós teña a oportunidade de construír o camiño que desexa”.