A Xunta de Persoal da área sanitaria de A Coruña e Cee volve á actualidade para denunciar que “tras máis de 50 días dende a agresión moi grave acontecida no servizo de urxencias do HUAC a un enfermeiro e a persoal de seguridade, a Xerencia continúa sen adoptar ningunha medida preventiva” para garantir a seguridade do colectivo sanitario.

Tanto a Consellería de Sanidade como a Xerencia da Coruña anunciaron en varias notas de prensa e a través dos medios de comunicación unha serie de supostas medidas que, lembran, “a día de hoxe non foron implantadas, nin avaliadas e que son totalmente insuficientes á hora de previr que acontezan estes sucesos”.

A Xunta lamenta que as propostas enviadas polas persoas traballadoras do servizo de urxencia á Xerencia da Área Sanitaria para “evitar os riscos”, “non foron escoitadas, nin valoradas, nin obtiveron ningún tipo de resposta, salvo o silencio e a indiferencia”. 

A Comisión de Centro do CHUAC afirma que “pese a solicitar reunións coa Xerencia para tratar de desbloquear a situación e negociar as medidas preventivas que permitan traballar nunhas condicións de traballo dignas pero sobre todo seguras, tampouco obtivo resposta, vulnerando así ó órgano de representación das/os traballadoras/es desta área sanitaria e por conseguinte desprezando ao conxunto de traballadoras/es”.

“Esta parálise na toma de decisións non pode continuar por máis tempo, urxen medidas de prevención e protocolos de actuación”, sinalan. “É necesario dotar de áreas de atención adecuadas e do persoal suficiente, xa que a falta de medidas non é só en urxencias senón que é extensible ás áreas de hospitalización dos hospitais e aos centros de atención primaria, onde esta xerencia xa normalizou as agresións e deixa as/os profesionais sen medios e sen medidas para desenvolver a súa actividade diaria”.

Nova Concentración

A Xunta de Persoal convoca para o venres 27 de marzo ás 12 h unha manifestación no CHUAC e concentracións nas portas de todos os centros de saúde da área sanitaria, así como unha concentración no Hospital Virxe da Xunqueira.

Máis novas do conflito

As/os traballadoras/es do CHUAC volveron manifestarse “Por un entorno seguro no traballo”

A xunta de persoal do Chuac solicita ante Sanidade o cesamento do xerente tras “anos” denunciando “falta de seguridade”

Sanitarios volven pedir medidas “inmediatas” contra as agresións: “Queremos traballar en condicións de seguridade”

“O Xerente da Área Sanitaria non sabe falar c@s traballador@s”