O Equipo Milladoiro en colaboración co Equipo A Coruña de asesoramento, prevención e resposta en materia de Ciberdelincuencia detivo e investiga a un veciño da cidade herculina como presunto autor de delitos de estafa, branqueo de capitais e extorsión. Creaba perfís falsos en apps de citas para estafar ás vítimas.
A investigación, Artepo, iniciouse a principios deste ano, a raíz do incremento das denuncias interpostas por estafas realizadas mediante o método ‘Roman Scam’. Segundo explican nun comunicado, este tipo de estafa consiste na creación de perfís falsos, nesta ocasión nas webs máis coñecidas de citas, a través dos que realizaba a captación de vítimas, encubrindo a súa identidade verdadeira.
Lograba así que estas cresen que mantiñan unha relación sentimental. Unha vez convencida a vítima, solicítalles diversas cantidades de diñeiro argumentando “as máis variadas situacións para conseguilo”.
No transcurso da investigación, os gardas civís tiveron constancia da existencia de nove vítimas nas localidades de Abegondo, Arteixo, Brión, Fene, Vilagarcía de Arousa, Madrid, Sevilla e Valencia, ascendendo o importe total da estafa a 27.000 euros.
Tras a análise minuciosa da información solicitada, os responsables da investigación, lograron a identificación plena do presunto autor da mesma, resultando ser un veciño da Coruña. A Garda Civil investigou a esta persoa como presunto autor dun delito continuado de estafa, outro de branqueo de capitais e un terceiro de extorsión, ao constatar que cando algunha das prexudicadas descubría a estafa e negábase a enviar máis diñeiro, este acosábaas telefonicamente e ameazábaas con publicar fotos íntimas.
