A Xunta requiriu ao goberno local da Coruña para que “complete a documentación” e “corrixa erros de vulto” en relación á solicitude de declaración de zona de mercado residencial tensionada solicitada polo consistorio a principios de mes.
Así o ratificaron fontes da Consellería de Vivenda consultadas por Europa Press que precisaron que non se rexeita o trámite, pero si se insta a completar documentación ao considerar que a remitida está “incompleta” e que debe haber máis concrecións nalgunhas cuestións.
O plan de actuacións formulado polo goberno local, para facer fronte á subida dos custos das vivendas, segundo expuxo a alcaldesa, a socialista, Inés Rey, tras o acordo adoptado na Xunta de Goberno, establece como obxectivo a 20 anos sumar 13.024 novas vivendas públicas. “Buscamos reforzar o paquete de accións que temos xa en marcha para facerlle fronte á subida dos custos da vivenda no termo municipal, que están a dificultar o acceso a esta a moitas coruñesas e coruñeses”, expuxo entón a rexedora.
A adopción desta medida aprobouse en Xunta de Goberno Local, despois de que os estudos técnicos encargados polo Concello constatasen que A Coruña cumpre cos dous criterios específicos que marca a Lei para poder solicitar a declaración. “O primeiro, que o custo da hipoteca ou aluguer e os gastos derivados da vivenda superen o 30% da renda media dos fogares e, o segundo, que o prezo da compra ou do aluguer experimentase, no últimos cinco anos, un crecemento un 3% superior ao do IPC”, especificou o edil de Urbanismo, Rehabilitación e Vivenda, Francisco Díaz Galego.
Ante o requirimento desde a Xunta, as fontes consultadas precisaron que só lle reclamaron “información completa e máis concreción“. “Unha vez envíen todo, seguimos coa tramitación”, sinalaron para precisar que non hai unha denegación. E é que no propio documento remarcan que “efectuadas as precisións” enténdese que se dan os supostos previstos na Lei polo Dereito á Vivenda “para que a cidade da Coruña poida solicitar a declaración de zona de mercado residencial tensionado”.
