O servizo municipal BiciCoruña arrinca unha nova fase de expansión, con obras xa en marcha para instalar sete novas bases. Estarán situadas nos barrios de Novo Mesoiro, Ou Castrillón, Os Rosales, Pescadería, Lonzas e Barrio das Flores.

Segundo informa o Concello da Coruña, na actualidade BiciCoruña conta con 49 estacións habilitadas e o seu obxectivo é incrementar este número a un total de 85. Farano, apunta, “atendendo ás necesidades específicas dos barrios e tamén aos fluxos de mobilidade das persoas usuarias, o que tamén fai preciso intervir ou ampliar bases existentes cunha alta demanda”.

En concreto, engade, xa está lista a obra civil en tres destas localizacións, avanzan os traballos de canalización noutras dúas bases e están “próximas a comezar” as actuacións previstas nas restantes.

O obxectivo é que as intervencións de acometida eléctrica — previas á posta en rúa das bases e da activación das mesmas — se vaian concretando “ao longo do mes de maio, para habilitar máis estacións de BiciCoruña nas próximas semanas”.

Ademais, o Concello aproveitará esta nova quenda de ampliación de BiciCoruña para ampliar a frota de vehículos dispoñible, sumando outras 300 bicicletas eléctricas, “necesarias para dar resposta á demanda xa existente”, apunta o consistorio.