A sección primeira da Audiencia Provincial da Coruña celebra este luns, día 28, o xuízo contra un home acusado da violación á súa parella. Por estes feitos, Fiscalía pide para el unha pena de dez anos de cárcere.

No seu escrito de cualificación, o Ministerio Público sostén que o home, natural de Perú, mantivo unha relación de afectividade análoga á do matrimonio coa vítima, desde inicios do mes de maio de 2020 ata o día 6 de xuño do mesmo ano, sen convivencia entre eles.

Relata tamén que o 6 de xuño de 2020, en hora non determinada no interior dunha das habitacións dun hotel da localidade da Coruña, ambos mantiveron relacións e que no transcurso da mesma ela pediulle que parase, ao que el non fixo caso tendo que empuxalo.

“A vítima logrou zafarse do procesado e acudiu ao baño da habitación” aínda que o home seguiuna “e actuando contra a vontade” dela “agarrouna fortemente polo pescozo, empuxouna contra o lavabo e tentou penetrala novamente” o que a muller logrou impedir. Logo empuxouna contra unha parede e consumou a penetración provocando diversas feridas á muller. Tamén lle contaxiou unha enfermidade.

O Ministerio Público cualifica os feitos como un delito de violación, coa agravante mixta de parentesco, e pide para o home unha pena de dez anos de prisión.