O alcalde de Pontedeume, Bernardo Fernández Piñeiro, foi proclamado de novo como secretario xeral do PSOE da Coruña no marco do V Congreso Provincial. Un acto no que estivo arroupado polo líder da formación en Galicia, José Ramón Gómez Besteiro, quen chamou a fortalecer as candidaturas na provincia co obxectivo posto en “reconquistar” concellos crave cunha proposta “ambiciosa e próxima á realidade da xente”.
Durante a súa intervención, o líder socialista situou ao PSdeG como “a única alternativa real ao modelo da dereita e do nacionalismo excluínte”, un discurso no que tamén reivindicou os valores da solidariedade, a cooperación e a responsabilidade como “sinais de identidade dun partido que leva 146 anos transformando a sociedade”. Neste sentido, Besteiro celebrou que “os grandes avances sociais” dos últimos anos en España e en Galicia “levan selo socialista”. Así, referiuse á subida do salario mínimo interprofesional, á educación e á sanidade pública, ou á redistribución da riqueza, entre outras medidas.
VISIÓN MUNICIPALISTA
Así mesmo, Besteiro aproveitou a súa intervención para reivindicar ao seu partido como unha formación “esencialmente municipalista”, nesta liña, instou aos militantes a “prepararse desde xa” con candidaturas “fortes, competitivas e ilusionantes” co obxectivo posto nas eleccións municipais de 2027. “Temos que seguir transformando A Coruña como está a facer Inés Rey, que devolveu á cidade a centralidade que perdera nos últimos anos de parálises e está a impulsar proxectos que fan da cidade un referente do noroeste peninsular”, esgrimiu o secretario xeral do PSdeG. Pero tamén tivo palabras para Ferrol ou Santiago de Compostela, “cuxo área metropolitana non debeu deixar de ser un referente como capital histórica e política de Galicia”. Neste sentido, asegurou que o PSdeG articulará “proxectos importantes que reforcen o seu liderado cultural e económico”.
“SÓ HAI UNHA ESQUERDA EN GALICIA”
Pola súa banda, Bernardo Fernández agradeceu á militancia polo apoio recibido e asegurou que é “unha honra e unha gran responsabilidade” revalidar como secretario provincial. A nova comisión executiva provincial socialista recibiu o aval de máis do 97 % dos votos, en concreto, emitíronse 175 votos, 171 a favor e catro en branco, o que supón un 97,7 % a favor, segundo destacaron. En canto aos novos nomes dentro desta executiva, son 40 dos 64, é dicir, case un 63 %, o que supón “unha porcentaxe importante de renovación”, sinalan fontes do partido.
Pola súa banda, o recentemente reelixido secretario provincial detallou que “os obxectivos seguen sendo os mesmos” e reivindicou que “non hai obxectivo que non se poida cumprir cunha formación como o PSOE detrás”. Pero tamén tivo palabras para o Goberno galego, ao que acusou de ser “unha Xunta caciquil que maltrata aos alcaldes e ás alcaldesas, e cunha repartición como o da época da que son herdeiros”. Respecto ao BNG, afeou aos nacionalistas que se consideren como unha formación de esquerdas “cando o nacionalismo nunca pode ser de esquerdas porque está baseado nas desigualdades”, asegurou. Con todo, aproveitou para insistir en que, “fronte aos que están no constante non e levantando fronteiras, só hai unha esquerda en Galicia, a que representa o PSOE”.
“O PP É O PARTIDO PERDIDO”
Finalmente, Besteiro acusou ao Goberno galego de actuar sempre “desde a confrontación e a submisión a Madrid”, neste sentido, fixo fincapé á xestión do apagamento eléctrico por parte da Xunta. “Mentres o delegado do Goberno asumía responsabilidades en solitario, a Xunta desapareceu. E cando Feijóo chegou con discurso de ataque, Rueda calou e agachou a cabeza”, subliñou o líder socialista. Pero tamén se referiu ao BNG como un “soberanismo desfasado” e de quen denunciou a súa “falta de compromiso” co proxecto europeo. Fronte a iso, reivindicou a “vocación internacionalista” do PSOE e do PSdeG e incidiu en que “a solidariedade non entende de fronteiras”.
Cómpre sinalar que durante o acto de clausura tamén interveu o presidente da Deputación da Coruña, Valentín González Formoso, quen insistiu na importancia de “traballar tamén desde a oposición” e que defendeu que os socialistas son “os responsables dos maiores avances que experimentou a provincia da Coruña e o país”. Pola súa banda, a Secretaria Federal de Política Económica e Transformación Dixital do PSOE, Emma López, cualificou ao PP como o “Partido Perdido”. Con todo, reprochou aos populares que “estean desnortados” e acusounos de ser “o partido do non a todo, cuxo único proxecto é pedir sistematicamente eleccións desde o 23 de xullo porque son incapaces de asumir que non teñen o poder”.
