A cidade da Coruña acolle esta fin de semana unha nova edición de ExpOtaku, o encontro de referencia para os amantes do anime, videoxogos, cómic, ilustración e cultura alternativa, que se celebrará os días sábado 25 e domingo 26 de maio no recinto feiral de ExpoCoruña. Segundo a organización, o evento contará con 25 expositores comerciais e unha ampla representación do talento galego e estatal, con 108 artistas, artesáns e ilustradores repartidos polo espazo.
Durante os dous días da feira, os máis de 5.000 metros cadrados habilitados acollerán un programa con máis de 150 actividades, pensado para públicos de todas as idades e intereses. Entre as propostas destacan os concursos de cosplay, os torneos de videoxogos, as zonas de photocalls temáticos, talleres creativos, exhibicións de láser tag, karaoke, xogos de rol e espazos interactivos centrados nas franquías máis populares do momento, como Pokémon ou Zelda.
Un dos principais atractivos do evento será a variedade de zonas temáticas, nas que o público poderá experimentar propostas tan dispares como duelos con sabres láser, partidas de quidditch, sesións de escape room, exhibicións de robótica ou mesmo acceder a unha zona de tatuaxes. A mestura entre cultura pop, ciencia ficción, tradición xaponesa e tendencias urbanas configuran o selo propio desta cita consolidada no calendario cultural coruñés.
ExpOtaku converteuse ao longo dos anos nun dos eventos referenciais para a comunidade fan galega, combinando espazos comerciais con actividades participativas e de lecer creativo. A organización destaca a súa aposta por manter prezos accesibles e contidos de calidade, promovendo ao tempo o contacto directo entre creadores, artistas e o seu público.
Con edicións celebradas en cidades como Barcelona, Zaragoza ou Alacante, o paso de ExpOtaku pola Coruña é un dos máis consolidados e con maior resposta de público, situando á cidade como epicentro do lecer alternativo durante a fin de semana. A apertura de portas será en horario continuado ao longo do sábado e o domingo, con entrada dispoñible tanto online como na propia billeteira do recinto.
