Acolleu esta fin de semana a Fundación Luís Seoane o acto de clausura da programación municipal do Día das Letras Galegas 2025. Un emotivo encontro dedicado ás cantareiras, protagonistas desta edición como símbolo da tradición oral e da transmisión cultural en feminino.
O encontro, moderado pola xornalista Gemma Malvido, contou coa participación de Richi Casás, Isabel García, José Manuel Pensado, Xosé Manuel Varela e Icía Varela. Analizouse a traxectoria artística e vital das pandeireteiras homenaxeadas, a súa vinculación coa cidade da Coruña, o papel pioneiro de Eva Castiñeira na escena folk galega e a importancia das gravacións de Dorothé Schubarth e da discográfica Ruada.
Tamén se reflexionou sobre a evolución da música tradicional e o papel dos medios na transmisión da cultura oral.
Como peche, o dúo Casás&Barcia interpretou unha selección de pezas inspiradas no repertorio oral das cantareiras, nunha actuación que mesturou emoción, respecto e celebración popular.
Richi Casás: “Rosa e Adolfina non teñen nada de especial, iso é o importante”
