Espectacular como afronta este comezo de verán a Asociación Veciñal Agra, con varios programas tremendamente activos, ademais das súas clases habituais.
De feito, para poñer en valor o traballo que ao longo do curso vén facendo a entidade, outro ano máis organiza o Festival Ferrados de Letras, que mostrará o talento da veciñanza do barrio. A cita será o sábado 31 de maio ás 19:30h no Ágora.
Nos últimos anos mudaron o formato deste espectáculo programando unicamente mostras dos colectivos que veñen tendo actividade cultural na Asociación. Así, as protagonistas serán as persoas do É así grupo Parabéns, que nos han achegar ao seu xeito de facer a música que senten, aos gaiteiros/as, a Tradivivas Agra (cantareiras/os e pandeireteiras/os), a cantadores e cantadoras… unha marea de tradición.
Pero este ano a novidade vén en clave de foliada, pois todo o mundo pode subir ao escenario a recitar ou cantar algunhas cantigas tradicionais e populares. As Letras Galegas deste ano son unha homenaxe á cultura tradicional representada nunhas poucas cantareiras.
Este festival, como todas as actividades do programa “Agra no Ágora” son de acceso libre e gratuíto; o programa está financiado polo Concello da Coruña e deseñado en colaboración coa Asociación veciñal Agra.
Foliagra en xuño
Pero a entidade xa pensa tamén no programa Foliagra, a festa tradicional do barrio da Agra do Orzán, que celebran no mes de xuño cun programa pensado para grandes e crianzas: (ruadas, concertos, cantos de taberna, monicreques e autómatas).
As rúas da Agra do Orzán serán o mellor destino para cantar, bailar e tomar uns aperitivos ou xantar calquera sábado e domingo do mes de xuño: entre as 11:30 e as 14 h os pasarrúas encherán as rúas de música e baile tradicional: sairán da praza das Cunchiñas e irán percorrendo as rúas anexas con música e pezas de baile.
A pesar de non contar cun gran espazo onde poder organizar unha festa ao aire libre (a pesar das infinitas mobilizacións polo Parque da Agra XA!), usan o auditorio do Ágora e algúns espazos escolares.
Dende o sábado 7 de xuño haberá Ruadas, con saída ás 11:30 dende a Praza das Cunchiñas, con diferentes grupos. Tamén haberá dous espectáculos de Trécola Producións para o alumnado do CEIP María Barbeito e Cerviño e do CEIP Raquel Camacho; non faltarán os Cantos de Taberna os sábados 7e e 21 de xuño polos bares da zona das 19:30 ás 22:30 h. E por último tamén haberá microconcertos da escola municipal e o concerto final o 28 de xuño.
O programa completo, coas localizacións, está en galizacultura.gal/agra/foliagra-2025.
Actividades que non paran
Pero ademais, as actividades habituais non paran e xa abren o prazo de inscrición para os cursos gratuítos de xullo de baile tradicional, pandeireta e pandeiro. Sempre que as condicións metereolóxicas o permitan desenvolverémolos ao aire libre, na praza das Cunchiñas, de luns a venres, en quendas de mañá (de 11:30 h a 13:30 h) ou tarde (de 16:30 h a 18:30 h).
- Luns, mércores e venres, nas primeiras horas: pandeireta e nas segundas baile.
- Martes e xoves, nas primeiras horas pandeiro e nas segundas baile.
