O presidente da Xunta, Alfonso Rueda, defendeu a decisión do seu Executivo de autorizar a declaración de mercado tensionado de vivenda na Coruña porque “cumpría os requisitos” que esixe a lei, o que converte á cidade herculina na primeira situada nunha comunidade do PP que logra este recoñecemento.
“Nós facemos o que tiñamos que facer“, esgrimiu Rueda, quen reafirmou que mantén as súas dúbidas de que esta declaración vaia a servir para solucionar os problemas de acceso á vivenda. “Haberá que seguir moi de preto todo o dito polo Concello da Coruña de que ía supor unha mellora evidentísima e case, non se se moi rápida, pero desde logo moi apreciable desde o principio. Eu sinceramente, o Goberno galego, cre que esta non é a solución. O Concello cre que si e así o pediu, alá cada un coas súas responsabilidades”, aseverou.
A posibilidade, engadiu, está “prevista na lei”. Deste xeito, defendeu que, pese ao desacordo do seu Executivo coa mesma, como “cumpría os requisitos”, procedeuse a autorizar a declaración. “O que fagan outras autonomías, outros responsables políticos doutras autonomías, non é cousa miña. Eu son responsable do que facemos en Galicia”, resolveu.
VIVENDAS DE PROMOCIÓN PÚBLICA NA CORUÑA
Noutra orde de asuntos, o Consello da Xunta deu luz verde á contratación da redacción dos proxectos básico e de execución e dirección de obra para a construción de 30 vivendas de promoción pública en chan cedido polo Concello da Coruña, na Rúa Pedro Fernández.
En concreto, a Consellería de Vivenda, a través da Sociedade de Vivenda Pública de Galicia (Vipugal), licitará este novo contrato para impulsar 30 novas vivendas protexidas, garaxes e trasteiros nas parcelas denominadas R3 e R4 da Rúa Pedro Fernández, que teñen unha superficie de 1.328 m2 e 290 m2 , respectivamente.
