A multa de 3.000 euros imposta pola Xunta de Galicia aos Franco por non abrir ao público a Casa Cornide, situada na Coruña, nos días establecidos, foi declarada firme. Así o confirmaron a Europa Press fontes da Consellería de Cultura despois de que se resolvese o recurso presentado pola familia do ditador. Agora notifícaselles a decisión e ponse fin á vía administrativa.
O escenario que se abre é ou ben que paguen a sanción imposta ou se non están conformes poden recorrer á vía xudicial, no ámbito contencioso-administrativo. Os Franco, propietarios dun inmoble polo que o Concello da Coruña xa iniciou actuacións para recuperalo para o patrimonio público –como se fixo no seu momento co Pazo de Meirás–, están obrigados a abrila ao público catro días ao mes despois de que fose declarada Ben de Interese Cultural (BIC).
Ao non facelo, foron sancionados pola Xunta con 3.000 euros de multa, unha decisión que a familia do ditador recorreu e que agora foi declarada firme. Todo iso despois de que, previamente á sanción, os Franco non atendesen aos requirimentos feitos para a apertura do inmoble. A Casa Cornide pasou a mans dos Franco tras unha poxa gañada por Pedro Barrié de la Maza que cedeu na década dos sesenta o inmoble á esposa do ditador, Carmen Polo, aínda que antes fora patrimonio municipal e estatal.
