A Coruña volveu tinguirse de verde este domingo, 8 de xuño, grazas á participación de máis de 3.300 coruñeses e coruñesas na XII edición da andaina solidaria A Coruña en Marcha Contra ou Cancro, organizada pola Asociación Española Contra o Cancro. Unha marea solidaria que, un ano máis, encheu as rúas herculinas con pasos firmes cara a un futuro sen cancro.

O Obelisco — epicentro desta cita solidaria— congregou desde primeira hora da mañá a persoas de todas as idades, que percorreron xuntas os cinco quilómetros do itinerario urbano, impulsados pola enerxía contaxiosa de quen sabe que cada paso conta para apoiar a investigación e acompañar a quen enfronta a enfermidade.

O pulso da cidade marcárono as batucadas dos Kilomberos de Monte Alto e a sesión DJ de Mais Music, que asolagaron a mañá de ritmo e alegría, mentres as clases de zoa e salsation, dirixidas por instrutores de Termaria e o Club do Mar San Amaro, animaron a grandes e pequenos a moverse ao son da música. Más de 80 persoas voluntarias da Asociación Española Contra o Cancro, fixeron posible este evento solidario e colaboraron durante os días previos na organización do evento.

As cifras seguen sendo incontestables e o cancro é unha realidade que impacta a miles de persoas cada día. En España diagnostícase un novo caso cada dous minutos, e estímase que para 2030 haberá máis de 317.000 novos diagnósticos.
Na provincia da Coruña, segundo datos do Observatorio da Asociación Española contra o Cancro, só en 2024 detectáronse preto de 8.000 novos casos.

Fronte a esta situación, a Asociación Española Contra o Cancro traballa para mellorar a supervivencia, coa meta de superar o 70 % para 2030. A Asociación ofrece na Coruña servizos gratuítos para pacientes e familiares. Ademais, en 2024 destinou máis de 2,25 millóns de euros a impulsar a investigación oncolóxica, un esforzo crave para avanzar na loita contra esta enfermidade.