Máxico o proxecto que están a desenvolver o CEIP San Francisco Xavier coa ONG Solidariedade Internacional no marco do Encontro O Globo. Unha iniciativa que convirte á cativada dos barrios de Catro Camiño e a Cubela, en auténticos axentes do cambio global.
De feito, o alumnado de 1ºB de Educación Primaria xa teñen novo alcume: “A tribu cambiamundos”, e están facendo unha marea de actividades para escoitar, e para ser escoitada.
Con esa intención naceu o “Nós tamén contamos!”, unha experiencia educativa transformadora que será presentada o vindeiro venres 13 de xuño no VII Encontro de O Globo, como exemplo dunha infancia activa, consciente e comprometida.
Partindo da lectura dos xornais na propia aula, as nenas e os nenos comezaron a ser conscientes das grandes problemáticas que afrontamos como sociedade: a guerra en Gaza, o problema da vivenda ou o proxecto de macrocelulosa Altri impactaron profundamente no alumnado, que non lograba comprender que as persoas adultas tomasen este tipo de decisións sen ter en conta os Dereitos Humanos e do planeta, nin tampouco a inacción ante problemáticas de tal magnitude. A partir de aí, iniciouse todo un proceso de investigación, de reflexión colectiva e de creación de propostas para tratar de cuestionar aquilo que non lles gustaba, sendo conscientes de que realmente, o reto en estaba en que debían conseguir que as súas voces fosen escoitadas e valoradas.
Ao longo do proceso, fixeron exposicións, actividades cooperativas, accións artísticas, cafés-diálogo e mesmo un obradoiro con Solidariedade Internacional de Galicia para coñecer os Obxectivos de Desenvolvemento Sostible, vencellándoos aos conflitos que foron identificando e entendéndoos como un compromiso que toda a cidadanía debe asumir.
E como colofón, converteron as súas demandas nun manifesto que logo derivou nunha regueifa reivindicativa, feita coa melodía dunha das pandeireteiras homenaxeadas nas Letras Galegas, para reclamar, alto e claro: “O futuro precisa de nós: escoitádenos!”
A súa voz chega agora a Santiago para formar parte do VII Encontro de O Globo, unha cita de referencia para iniciativas de transformación social en Galicia que, ano tras ano, acolle a numerosos colectivos sociais e centros educativos para poñeren en común as iniciativas que desenvolven para facer do mundo que habitamos un lugar máis xusto, humano e habitable.
Mäis novas
Formar mestres para converter as aulas en centros de transformación social
Cambiando os patios escolares para que non reproduzan desigualdades
