A Xunta Directiva do Colexio oficial de Médicos da Provincia da Coruña decidiu, nunha reunión celebrada de urxencia este venres, aprazar a celebración da XVII edición do Encontro Médico, que estaba prevista para este sábado, día 14, en Ferrol. Segundo traslada o organismo, fíxoo tras coñecer a noticia do falecemento do doutor José Pedrouzo Bardelas, quen ía recibir durante o acto a Medalla de Ouro e Brillantes, a máxima distinción que outorga o Colexio.

Así mesmo, a institución “lamenta profundamente o falecemento do doutor Pedrouzo e únese á dor da súa familia e amigos”. “Un médico exemplar que sempre priorizou a saúde e o benestar dos seus pacientes en todos os ámbitos nos que desenvolveu a súa carreira profesional”, engade. José Pedrouzo exerceu no centro de saúde de Serantes — onde foi xefe do Servizo de Atención Primaria — e como médico de empresa en Bazán — actualmente, Navantia –. Tamén formou parte do Corpo Nacional de Médicos Forenses e traballou no Servizo de Medicamento Interno do hospital público de Ferrol, no sanatorio privado San Javier e na PAC Fontenla Maristany.